Tanzania: UNHCR iramagana ’kotsa igitutu’ impunzi z’Abarundi ngo zitahe

Ishami ry’umuryango w’abibumbye ryita ku mpunzi (UNHCR) rivuga ko ryongeye gusaba abategetsi ba Tanzania ko gutaha kw’impunzi z’Abarundi bigomba kuba ku bushake aho kotswa igitutu.

UNHCR ivuga ko muri iki gihe cya vuba yabonye izi mpunzi zishyirwaho igitutu ngo zitahe, “nyamara abategetsi baheruka kwizeza ko nta mpunzi izacyurwa ku ngufu, nta terabwoba”.

Tanzania irimo impunzi z’Abarundi 206,000 nk’uko UNHCR ivugwa. Abenshi bahunze imidugararo ya politiki yo mu 2015, baba mu nkambi za Nyarugusu, Nduta na Mtendeli mu ntara ya Kigoma.

Kuva mu ntangiriro z’uku kwezi hari impunzi z’Abarundi ziva muri Tanzania zigarurwa mu Burundi.

Bamwe mu mpunzi bakiri muri Tanzania babwiye BBC ko kubatera ubwoba ko bagomba gutaha byakomeje nubwo abategetsi ba Tanzania bavuze ko gutaha ari ku bushake.

Mu cyumweru gishize, umuvugizi w’ishami ry’umuryango w’abibumbye mu Burundi yabwiye BBC ko hari umubare ugereranyije w’impunzi z’Abarundi ziri gutahuka ariko bataramenya imibare yazo neza.

UNHCR isaba za guverinoma kurekera impunzi amahitamo yo gutaha maze nayo igakomeza gufasha izi mpunzi gutaha ku bushake.

Tariki 03 z’uku kwezi kwa 10, umuvugizi wa leta ya Tanzania yavuze ko nta mpunzi z’Abarundi zizacyurwa ku ngufu.

Mu kwezi kwa munani, minisitiri w’ubutegetsi bw’igihugu wa Tanzania yabwiye BBC ko tariki 01/10 uyu mwaka bazatangira gucyura impunzi z’Abarundi zose, “babyemera cyangwa batabyemera”.

Umwe mu bagore bahungutse ku bushake, nyuma akongera guhunga, yabwiye BBC ko afite ubwoba ko ahungutse nanone yagirirwa nabi nk’uko byagenze mbere.

Tariki 10 z’uku kwezi, Perezida John Magufuli wa Tanzania yavuze ko izi mpunzi “zikwiye gutaha iwabo ku neza kuko u Burundi ubu bumaze kugira umutekano”.

UNHCR ivuga ko izakomeza gufasha abifuza gutaha ku bushake, no gufasha no kurinda abifuza kuguma mu buhungiro muri Tanzania.

UNHCR ivuga ko kuva mu 2017 impunzi zigera ku 79,000 zari zarahunze zimaze gutahuka ku bushake ku bwumvikane n’ubufatanye bw’ibihugu byombi n’iri shami ryita ku mpunzi.

Leta y’u Burundi yakomeje kuvuga ko umutekano wagarutse mu gihugu, ishishikariza impunzi gusubira iwabo.

ONU ivuga ko Abarundi barenga 400,000 bahunze mu mwaka 2015 kubera ibikorwa by’urugomo byakurikiye kwiyamamaza kwa Perezida Petero Nkurunziza kuri manda ya gatatu kutavuzweho rumwe.

Kuva icyo gihe, hari bamwe batahutse.

BBC

kundwa online

Roicos is an entertainer, designer, MC, photographer, author and owner at Sky Studio

Next Post

Nyanza:UMUHIRE Claudine umuhuzabikorwa wa MAJ yitabye Imana mu buryo butunguranye

Tue Oct 29 , 2019
Share on Facebook Tweet it Share on Google Pin it Email Umuhuzabikorwa w’inzu zitanga ubufasha mu by’amategeko [MAJ] mu karere ka Nyanza Madamu UMUHIRE Claudine yanyereye mu bwogero bwo mu rugo iwe ahita apfa. Nkuko amakuru agera ku Umuryango abitangaza,mu gitondo cyo kuri uyu wa kabili taliki ya 29 Ukwakira […]

Editor In Chief

Jean Roicos

Roicos is an entertainer, designer, MC, photographer, author and owner at Sky Studio